ກຸ່ມບໍລິສັດ ພອນສັກ ຈຳກັດ (Phonesack Group Co., Ltd) ລົງທຶນ 4 ຕື້ໂດລາສະຫະລັດ ເພື່ອກໍ່ສ້າງໂຮງໄຟຟ້າພະລັງງານຄວາມຮ້ອນຖ່ານຫີນຂະໜາດໃຫຍ່ໃນແຂວງເຊກອງ ໂດຍໄຟຟ້າທີ່ຜະລິດໄດ້ຈະຖືກສົ່ງອອກໄປຂາຍໃຫ້ປະເທດກຳປູເຈຍ.

ພິທີວາງສີລາລືກສຳລັບໂຮງໄຟຟາດັ່ງກ່າວ ໄດ້ຈັດຂຶ້ນຢູ່ສະຖານທີ່ກໍ່ສ້າງໂຄງການຢູ່ເມືອງກະລຶມ ເມື່ອຄັ້ງວັນທີ 2 ເມສາ ໂດຍມີພະນະທ່ານ ສະເລີມໄຊ ກົມມະສິດ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດ, ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ເຫຼັກໄລ ສີວິໄລ ເຈົ້າແຂວງເຊກອງ, ພ້ອມດ້ວຍພາກສ່ວນລັດຖະບານຈາກສູນກາງ ແລະ ທ້ອງຖິ່ນ ລວມທັງຄູ່ຮ່ວມທຸລະກິດ ເຂົ້າຮ່ວມ.

ທ່ານ ພອນສັກ ວິໄລສັກ ປະທານກຸ່ມບໍລິສັດ ພອນສັກ ໄດ້ກ່າວວ່າ ໂຮງໄຟຟ້າແຫ່ງນີ້ ຈະມີກຳລັງການຜະລິດ 1,800 ເມກາວັດ ແລະ ຈະກາຍເປັນໜຶ່ງໃນບັນດາໂຄງການພັດທະນາອຸດສາຫະກຳພະລັງງານທີ່ສຳຄັນທີ່ສຸດຂອງ ສປປ ລາວ.

ເມື່ອສ້າງໂຮງໄຟຟ້າສຳເລັດ, ກະແສໄຟຟ້າທີ່ຜະລິດໄດ້ ຈະຖືກສົ່ງເຂົ້າສູ່ຕາໜ່າງໄຟຟ້າຂອງປະເທດກຳປູເຈຍ ພາຍໃຕ້ສັນຍາຊື້-ຂາຍໄຟຟ້າ (Power Purchase Agreement) ກັບ ວິສາຫະກິດໄຟຟ້າກຳປູເຈຍ (EDC).

ການກໍ່ສ້າງຈະຖືກແບ່ງອອກເປັນ 3 ໄລຍະ ໂດຍໂຮງໄຟຟ້າຊຸດທຳອິດມີກຳນົດເລີ່ມຜະລິດກະແສໄຟຟ້າໃນເດືອນມັງກອນ 2028 ແລະ ວາງແຜນໃຫ້ສໍາເລັດສົມບູນພ້ອມດໍາເນີນງານໃນເດືອນມັງກອນ 2030.

ໂຄງການດັ່ງກ່າວ ຈະຖືກບໍລິຫານຈັດການໂດຍບໍລິສັດລູກຂອງ ກຸ່ມບໍລິສັດ ພອນສັກ ຊຶ່ງໄດ້ແກ່ ບໍລິສັດ ພະລັງງານໄຟຟ້າຄວາມຮ້ອນ ເຊກອງ ຈຳກັດ (XTPPL) ແລະ ບໍລິສັດ ໄຟຟ້າ ເຊກອງ ຈຳກັດ (XPPL).

ນອກເໜືອຈາກການກໍ່ສ້າງໂຮງໄຟຟ້າແລ້ວ, ໂຄງການດັ່ງກ່າວຍັງລວມເຖິງການກໍ່ສ້າງສາຍສົ່ງກະແສໄຟຟ້າແຮງສູງ 500 ກິໂລໂວນ ທີ່ມີຄວາມຍາວ 253 ກິໂລແມັດ ເພື່ອເຊື່ອມຕໍ່ໂຮງໄຟຟ້າດັ່ງກ່າວເຂົ້າ ຫາຊາຍແດນລາວ-ກຳປູເຈຍ.